“Panorama Sport” ju sjell momentet pikante të ndeshjes Partizani-Erzeni, që u luajt në “Air Albania”, por u “sundua” nga tifozët shijakas. Në stadium ishin të pranishëm rreth 2 mijë tifozë.
* Orges Shehi, trajneri i ardhshëm i Partizanit, shfaqet në tribunë para ndeshjes në shkallët e stadiumit, këtë herë pa ndrojtjen e askujt. Durrsaku para ndeshjes shfaqet i shoqëruar nga drejtori i marrëdhënies me median, Olsi Ranxhi, e më pas ndjek ndeshjen i qetë dhe i përqendruar. Durrsaku pritet të firmosë për 3 vite. Me siguri Shehi ka nisur edhe planet për mënyrën se si do ta drejtojë ekipin.
* Ndeshjes i paraprin një ceremoni e shkurtër, ku Murataj me Superkupën e Rrapaj, Cara e Hadroj me çmimet e fituara nga ceremonia “Më të mirët”, përshëndetën tifozët e pranishëm dhe pozuan së bashku. Kjo u pasua nga një foto me skuadrën olimpike speciale.
* Në një moment të pjesës së parë portieri Hasanbelli “debaton” me mbrojtësit për ekzekutimin e një rivënieje fundore. Ata hapen në krahë për ta nisur nga poshtë, por portieri u ulëriti të avancojnë, sepse vendos të luaje me top të gjatë.
* Murataj kërkon të shpërqendrojë sa më shumë Kahrimanoviç te momenti i penalltisë. Kapiteni i kuq shkon dhe lëviz pak centimetra topin, me pretendimin se sfera është vendosur në vendin e gabuar.
* Një moment i rrallë shënohet në minutën e 69-të, aty kur dy vëllezërit Gjergji dhe Kristi Kote futen në të njëjtin moment në fushë, por me fanella të ndryshme. Gjergji luan për Partizanin, ndërsa Kristi për shijakasit. Edhe ky i fundit e ka nisur karrierën te “demat”, për të kaluar më pas te Kukësi e së fundmi te shijakasit.
* Në minutat e fundit të sfidës, Partizani ka vetëm dy lojtarë me rol natyral mbrojtës. Ata janë Sota dhe Hadroj. E gjithë pjesa tjetër janë mesfushorë ose sulmues, me Abilaliajn, që zbraz gjithë “arsenalin” e tij për të gjetur golin e barazimit.
* Andi Hadroj duket mjaft i mërzitur pas ndeshjes. Menaxheri i ekipit, Amarildo Dajlani shkon ta ngushëllojë, por pukjani e largon me ngulm.
