Platforma e rrjeteve sociale “TikTok” do të mbyllet për përdoruesit në Shqipëri nesër më datë 13 Mars.
Autoriteti i Komunikimeve Elektronike dhe Postare (AKEP) ka kërkuar nga të gjithë ofruesit e shërbimeve të internetit (ISP) në Shqipëri të bllokojnë aksesin në platformën TikTok brenda datës 13 Mars 2025. Kjo kërkesë vjen pas një vendimi të Autoritetit Kombëtar për Sigurinë Kibernetike (AKSK), i cili kërkoi ndërmarrjen e masave të nevojshme për të ndaluar qasjen në aplikacionin TikTok dhe infrastrukturën e tij digjitale në territorin shqiptar.
Në një e-mail të dërguar subjekteve ISP, AKEP ka urdhëruar bllokimin e IP-ve dhe DNS-ve të TikTok, si dhe të SNI (Server Name Indications) dhe IP-ve të kompanisë ByteDance, që është pronari i TikTok. Vendimi ka bazë ligjore në një akt të Këshillit të Ministrave, si dhe në dispozitat e ligjit për komunikimet elektronike.
Ky veprim është një zbatim i Vendimit të Këshillit të Ministrave nr. 151, datë 6 mars 2025, i cili ka caktuar mbylljen e TikTok për një periudhë 1-vjeçare, për shkak të shqetësimeve për nxitjen e dhunës tek të miturit. Ky vendim ka shkaktuar kundërshtime nga opozita, e cila ka shpallur një protestë për të kundërshtuar mbylljen e platformës, që do të zhvillohet më 15 mars 2025.
Shkresa-e-AKEP-359_003_11032025
Shkresa-e-AKSK-per-mbyllje-IP-dhe-domaine-te-TikTok-359_002_10032025
