Një nga portalet më të njohura në fushën e teknologjisë, Gizmodo, ka publikuar një guidë se si shqiptarët mund të hapin rrjetin TikTok në Shqipëri, duke anashkaluar censurën qeveritare.
“Për fat të mirë për shumë përdorues të ndërgjegjshëm, tejkalimi i ndalimit të TikTok në Shqipëri është shumë i lehtë.
Shqiptarët kanë vënë re se përdorimi i NordVPN dhe ExpressVPN ofron rezultate të menjëhershme.
VPN të tilla janë të afta të ndryshojnë adresën IP të një përdoruesi dhe të kodojnë lidhjen e tij.
Në këmbim, një përdorues do të jetë në gjendje të pretendojë se është diku tjetër dhe të mbrojë privatësinë e tij,” shkruan portali.
Edhe shumë gazetarë dhe ekspertë në Shqipëri kanë nisur të shpërndajnë udhëzime se si shqiptarët të hapin lehtësisht rrjetin social TikTok duke anashkaluar vendimin e qeverisë.
Kujtojmë se opozita shqiptare ka thirrur një protestë më 15 mars kundër këtij vendimi të Edi Ramës.
