Banorët dhe aktivistët në Lezhë u mblodhën sot sërish për të protestuar kundër fabrikës së përpunimit të mbetjeve me origjinë shtazore, e cila ndodhet në lagjen “Skënderbeg”. Qytetarët u mblodhën në qendër të qytetit dhe me pankarta në duar marshuan drejt fabrikës, duke shprehur shqetësimin e tyre për ndotjen e ajrit dhe mjedisit.
Protestuesit denoncuan se era e rëndë dhe ndotja e shkaktuar nga fabrika po ndikon negativisht në cilësinë e jetës dhe shëndetin e komunitetit, duke e cilësuar si të pafalshme heshtjen e institucioneve vendore dhe qendrore përballë kësaj situate.
Nga ana tjetër, përfaqësues të fabrikës pretendojnë se po respektojnë të gjitha rregulloret mjedisore dhe se aktiviteti i tyre nuk krijon ndotje në mjedis. Sidoqoftë, qytetarët paralajmëruan se nëse nuk merren masa konkrete, do të vazhdojnë me protesta të tjera.
