Xhovani Kolela ish te i munguari i madh në mbrëmjen e djeshme të dhënies së çmimeve për vitin 2023 në futbollin shqiptar. Edhe pse vjet u shpall kampion, trajnerët dhe kapitenët e Superiores nuk e përfshinë italianin në listën e tre më të mirëve. Në një intervistë ekskluzive për “Panorama Sport”, italiani flet në lidhje me mospërfshirjen në këtë çmim, por edhe për Partizanin dhe largimin e Da Silvës.
Fituat titullin kampion me Partizanin, por nuk ishit në listën e treshes së më të mirëve. U surprizat?
Sinqerisht, nuk e mbaja mend ekzistencën e një çmimi të tillë dhe kam menduar rreth kësaj vetëm dy ditë më parë, kur edhe nisën të flasin të gjithë.
Mendoni që të paktën duhej të ishit në listën e tre trajnerëve më të mirë të vitit të shkuar?
Po, unë mendoj se duhej të isha në këtë listë të shkurtër të trajnerëve më të mirë, por ndoshta jam i vetmi që mendoj kështu (qesh).
U shpallët kampion me Partizanin, por a ndiheni sadopak i nënvlerësuar për arritjen e këtij suksesi?
Unë mund të them shumë gjëra rreth aventurës sime te Partizani dhe punës që është bërë atje, por mendoj se jeni ju gazetarët dhe vetë opinioni publik, që mund ta bëjnë këtë vlerësim. Nuk mund ta bëj unë.
