Pas ngjarjes së rëndë në burgun e Peqinit, një natë më parë në të gjitha institucionet e vuajtjes së dënimit të sigurisë së lartë, gjatë kontrolleve janë gjetur sende të paligjshme.
Mësohet se në Burgun e Sigurisë së Lartë të Burrelit, është gjetur celular në një frigorifer që do të futej brenda tek të burgosurit, ndërsa ende nuk dihet kujt i përket.
Sipas raportimeve nga News24, frigoriferi ku ishte fshehur telefoni vinte nga burgu i Peqinit ku do të transferoheshin disa të burgosur. Fillimisht ka ardhur ngarkesa me materialet, më pas do të vinin të burgosurit.
Ndërkohë, ende nuk dihet se kujt i përkiste frigoriferi në të cilin është gjetur një aparat celular i vendosur në një vend të fshehtë të tij.
Megjithatë, kanë nisur hetimet për të dokumentuar ngjarjen dhe ndëshkimin e personave që kanë tentuar të fusin sende të paligjshme në qelitë e të burgosurve.
