Një lajm i trishtë për botën e artit dhe jo vetëm. Këtë të martë të 5 dhjetorit është ndarë nga jeta artisti i mirënjohur shqiptar Mirush Kabashi. Lajmi është bërë me dije nga vetë familjarët e tij, të cilët njoftuan me një pikëllim të thellë.
“Të nderuar miq, kolegë dhe aashamirës, me pikëllim të thellë ju njoftojmë se MIRUSH KABASHI ndërroj jetë të Martën, në datë 5 Dhjetor pas mesnate. Përsa i përket detajeve të ditës, orës së varrimit dhe homazheve do ju komunikojmë në orët në vazhdim. Me Respekt, Familja Kabashi!”, thuhet në njoftim.
Është pak të thuhet se Kabashi ishte një artist i njohur. Ai la pas një trashëgimi të pasur artistike, si aktor i rreth 100 roleve në teatër dhe filma.
Jo vetëm kaq, ai është cilësuar si një nga interpretuesit më të mëdhenj të poezisë në Shqipëri. Kontributi i tij është i larmishëm, si në filmografinë shqiptare e ashtu në teatër, të cilit i kushtoi një pjesë të mirë të jetës së tij.
Kabashi lindi në vitin 1948 në qytetin e Shkodrës, me origjinë nga një familje gjakovare nga i ati. Por ai u rrit në Durrës.
Në 1970 u diplomua aktor në Institutin e Lartë të Arteve në Tirane dhe filloi punë në teatrin “Aleksandër Moisiu” të Durrësit. Aty, vazhdoi deri në vitin 1994, duke kryer edhe detyrën e drejtorit, 1991-1993.
Me pas punoi në Televizionin Shqiptar, në departamentin e Programeve Artistike si ideator dhe prezantues, kurse nga 2002 e në vijim në Teatrin Kombëtar.
Nga viti 1985, me periudha të ndërprera, është aktivizuar si pedagog i “Mjeshtërisë se Aktorit” pranë Akademisë së Arteve. Ai është nderuar me titujt e lartë “Nderi i Kombit”, “Artist i Merituar” dhe “Mjeshtër i Madh i Punës”.
