Te Partizani në vitet e fundit kanë ardhur e kanë ikur shumë sulmues, por një beniamin i tifozëve, që vazhdon të kontribuojë dhe të thyejë rekorde me fanellën e kuqe, është Tedi Cara.
Sulmuesi kavajas, që është edhe golashënuesi më i mirë i klubit në dekadën e fundit, u kthye te goli në sfidën ndaj Erzenit, ku realizoi një nga golat më të bukur të javës, me një driblim mes dy lojtarëve dhe me një goditje drejt e në trekëndësh. Pas ndeshjes, Cara u prononcua për “Panorama Sport”, ku foli për ndeshjen, ecurinë e ekipit, si dhe atë personale.
Shpresoni të mos ndaleni pas këtyre dy golave në 3 javët e fundit?
Normalisht, për një sulmues kur shënon gol është një ndjesi e veçantë dhe shumë e mirë. Të jep një ndjenjë çlirimi, por duhet të vazhdoj gjithnjë të shënoj dhe të regjistroj vazhdimësi. Unë kam shënuar edhe para dy javësh, por këtë duhet ta bëj çdo javë. Të ndihmoj ekipin dhe të shënoj sa më shumë gola personalisht.
U duk sikur e kishit gjithçka në dorë. Përse rezultoi kaq e vështirë?
Mendimi është se patëm një dozë nënvlerësimi pas situatave që ndodhën. Në pjesën e dytë patëm një garanci të tepruar se do të fitonim, por ishte e gabuar. Kundërshtarë si Erzeni, që u kanë shkaktuar dëme edhe skuadrave të tjera në krye, duhen respektuar. Edhe pse ishte me karton të kuq, duhej të bënim të njëjtat detyra dhe të kishim sulmuar më tepër në pjesën e dytë, që të vinte edhe goli i sigurisë.
