Kur Mensah është në fushë duhet të bësh kujdes në minutat e fundit. Ai shënoi në derbi në minutat shtesë duke vulosur fitoren. Nëse dikush mendoi që ishte rastësi, ai e “përgënjeshtroi” menjëherë këtë perceptim, sepse shënoi edhe kundër Erzenit.
Por kush nuk bindet me këto të dhëna, pra kush dyshon se Mensah është njeriu i golave ekstrem, atëherë po ju sjellim në vëmendje edhe këto fakte: në sezonin 2021- 2022 kur ai luante për Skënderbeun dhe shënonte 9 gola, Mensah tre prej tyre i ka shënuar pas minutës së 86-të.
Për ironi të fatit, “preja” e preferuar është Tirana, sepse edhe atëherë i shënoi në dy ndeshje: në minutën e 96-të me penallti në humbjen 3-2 dhe në minutën e 90- të në humbjen 4-2. Atë sezon Mensah i ka shënuar edhe Kukësit në minutën e 86-të në fitoren 2-1. Interesant është që Mensah është i rrezikshëm edhe në minutën e 20-të. Dy gola kur luante me Skënderbeun ia ka shënuar pikërisht Partizanit dhe Kukësit në këtë minutë. Ndërsa një gol ia ka shënuar Teutës në minutën e 19-të.
Erdhët nga stoli dhe i dhatë skuadrës fitoren. Sa i lumtur jeni?
Po, ishte një moment i bukur dhe i rëndësishëm. Jam shumë i lumtur. Nuk kanë qenë të lehta këto kohë për mua, pasi për të paktën dy muaj nuk kam mundur të luaj. Është shumë mirë për mua, që ristartoj në këtë mënyrë.
Në Shqipëri keni shënuar 5 gola në minutat e fundit. Tre me Skënderbeun dhe dy me Partizanin. Është ky specialiteti juaj?
Po, është e vërtetë. Por do të thosha se më shumë është çështje fati, falë Zotit ia kam dalë dhe kam arritur t’u jap pikë të dyja ekipeve. Në futboll mund të ndodhë gjithçka. Mund të shënosh edhe në pak sekonda të mbetura.
A jeni rikuperuar plotësisht nga operacioni i kryer?
Jeni gati ta ndihmoni skuadrën? Po, po. Tani jam gati dhe prezent për të bërë gjithçka për skuadrën. Shpresoj që tashmë të mos kem probleme dhe të jem gjithnjë në dispozicion.
Keni shumë konkurrencë në sulm. Si e prisni këtë sezon?
Po, ndoshta kemi shumë sulmues dhe konkurrencë, por kjo nuk është diçka për t’u mërzitur. Ky është futbolli, çdokush arrin ta marrë shansin nëse e meriton. Unë do të mundohem t’i tregoj stafit dhe tifozëve se çfarë mund të bëj.
Mund ta dominojë Partizani këtë sezon dhe të fitojë titullin kampion?
Po, sigurisht. E kemi nisur mjaft mirë dhe duhet të vijojmë të luftojmë fort, deri në fund.
