Tre persona janë arrestuar në flagrancë në Burrel, pasi dyshohet se merreshin me përgatitjen dhe shitjen e kokainës në zona të ndryshme të qytetit. Arrestimet u kryen në kuadër të operacionit policor të koduar “Start 3”.
Në pranga kanë rënë A. M., 27 vjeç, dhe D. Gj., 55 vjeç, të dy banues në Sanxhak të Laçit, si dhe N. Gj., 72 vjeç, banues në Burrel.
Gjatë kontrolleve fizike dhe në banesat e të dyshuarve, shërbimet e policisë kanë gjetur dhe sekuestruar 94.70 gramë lëndë të dyshuar narkotike kokainë, 19 fishekë luftarakë të kalibrave të ndryshëm, 13 telefona celularë, dy peshore elektronike, një automjet dhe një orë dore të markës “Rolex”.
Sipas hetimeve paraprake, tre personat dyshohet se vepronin në bashkëpunim me njëri-tjetrin për përgatitjen dhe shpërndarjen e lëndës narkotike në zona të ndryshme të Burrelit.
Materialet procedurale për këtë rast i janë referuar Prokurorisë, e cila do të vijojë me veprimet e mëtejshme ligjore.
