Tensionet kanë përfshirë Kuvendin e Shqipërisë në rikthimin e seancës pas pushimit, ku deputetët e opozitës kanë vijuar protestën duke bllokuar foltoren, përmbysur karriget dhe hedhur ujë në sallë.
Pavarësisht situatës së krijuar, mazhoranca ka vijuar procedurën parlamentare me votimin me kartonë të projektkalendarit. Gjatë zhvillimeve në sallë nuk kanë munguar as thirrjet e deputetëve të opozitës, të cilët kanë brohoritur “Parlament i krimit” dhe “Ju erdhi fundi!”.
Opozita e ka bllokuar foltoren që në nisje të seancës, menjëherë pas leximit të rendit të ditës nga kryetari i Kuvendit, Niko Peleshi. Situata është tensionuar më tej kur fjalën e ka marrë kreu i grupit parlamentar të Partisë Socialiste, Taulant Balla.
Në atë moment, deputetët e Partisë Demokratike janë afruar pranë vendit ku ai po fliste, ndërsa Flamur Noka e ka shtyrë dhe i ka tërhequr mikrofonin.
Ndërkohë, kreu i Partisë Demokratike, Sali Berisha, është parë fillimisht i ulur në karrigen e tij, duke u dhënë udhëzime deputetëve të opozitës për veprimet e tyre. Në një moment, ai është ngritur dhe ka komunikuar me deputetët Gent Strazimiri dhe Flamur Noka.
Pavarësisht kaosit dhe bllokimit të foltores nga opozita, mazhoranca ka vijuar me procedurat e votimit në Kuvend.
