Një problem teknik i përkohshëm në sistemin e monitorimit të trafikut ajror të Albcontrol ka shkaktuar pezullimin e fluturimeve në hapësirën ajrore shqiptare për disa minuta, si masë sigurie.
Sipas njoftimit të Aeroportit Ndërkombëtar të Tiranës, problematika është adresuar menjëherë dhe aktualisht po punohet për rikthimin e plotë të operacioneve në normalitet.
Situata ka sjellë vonesa dhe ndryshime në oraret e fluturimeve. Deri tani janë anuluar 5 fluturime, ndërsa një tjetër është riplanifikuar për ditën e nesërme. Po ashtu, 12 fluturime kanë pësuar vonesa në nisje dhe 3 fluturime janë vonuar në mbërritje.
TIA ka shtuar stafin në dispozicion për menaxhimin e situatës në terminal dhe për asistimin e pasagjerëve të prekur nga vonesat apo ndryshimet e orareve.
Aeroporti deklaron se është në komunikim të vazhdueshëm me autoritetet përkatëse dhe kompanitë ajrore, ndërsa ekipet janë në gatishmëri për të përshpejtuar rikthimin e operacioneve në normalitet.
Pasagjerëve u është kërkuar të kontrollojnë vazhdimisht informacionet e kompanive ajrore për të mësuar statusin më të fundit të fluturimit të tyre.
“Siguria e pasagjerëve mbetet prioriteti kryesor”, thuhet në njoftim.
NJOFTIMI I PLOTE
Për shkak të një problemi teknik të përkohshëm në sistemin e monitorimit të trafikut ajror nga Albcontrol, fluturimet në hapësirën ajrore shqiptare u pezulluan për pak minuta si masë sigurie.
Problematika u adresua menjëherë dhe aktualisht po bëhen të gjitha përpjekjet për rikthimin sa më të shpejtë të operacioneve në normalitet.
Aeroporti Ndërkombëtar i Tiranës është në kontakt të vazhdueshëm me të gjitha autoritetet përkatëse dhe kompanitë ajrore, ndërsa po menaxhon pasagjerët e prekur nga vonesat dhe ndryshimet në oraret e fluturimeve.
TIA ka angazhuar numrin maksimal të stafit në dispozicion për të mbështetur operacionet në terminal dhe për të garantuar menaxhimin sa më të shpejtë të situatës. Ekipet tona janë në gatishmëri të plotë dhe po bëjnë maksimumin për të përshpejtuar rikthimin e operacioneve në normalitet.
Pasagjerët këshillohen të kontrollojnë rregullisht njoftimet dhe komunikimet e kompanive të tyre ajrore për informacionin më të fundit mbi statusin e fluturimit.
Siguria e pasagjerëve mbetet prioriteti kryesor.
