Të burgosurit shqiptarë në Angli dhe Uells kanë kryer më shumë se 157 mijë telefonata gjatë gjashtë muajve të fundit, një shifër që ka ngritur dyshime se një pjesë e tyre mund të vazhdojnë të drejtojnë aktivitetet kriminale edhe nga burgu. Kështu shkruan The Telegraph, duke iu referuar të dhënave të Ministrisë britanike të Drejtësisë.
Sipas statistikave zyrtare, 1,200 të burgosur shqiptarë kanë kryer gjithsej 157,962 telefonata, ose rreth 900 telefonata në ditë, më shumë se dyfishi i çdo kombësie tjetër të huaj në burgjet e Anglisë dhe Uellsit.
Shqiptarët përbëjnë grupin më të madh të shtetasve të huaj në burgjet britanike, të ndjekur nga polakët dhe rumunët. Sipas të dhënave të shërbimit penitenciar, shqiptarët kanë kryer rreth katër herë më shumë telefonata se polakët dhe rumunët, të cilët regjistruan respektivisht 37,691 dhe 37,307 telefonata gjatë së njëjtës periudhë.
Profesori Ian Acheson, ish-drejtor burgu dhe ish-këshilltar i qeverisë britanike për ekstremizmin në burgje, e cilësoi këtë numër telefonatash si “jashtëzakonisht disproporcional”.
Ai deklaroi se grupet kriminale shqiptare dominojnë shpërndarjen e drogës brenda burgjeve dhe se nuk do të ishte befasuese nëse disa prej tyre do të përdornin telefonat për të koordinuar aktivitetet kriminale jashtë mureve të burgut.
Raporti rikujton edhe deklaratat e ish-ministrit britanik të Drejtësisë, David Lammy, i cili kishte paralajmëruar se drejtuesit e bandave po menaxhojnë gjithnjë e më shumë organizatat e tyre kriminale nga burgu. Sipas tij, grupet kriminale përdorin edhe dronë të sofistikuar për të futur drogë dhe armë në institucionet penitenciare, duke shmangur masat tradicionale të sigurisë.
The Telegraph shkruan se shumica e shtetasve shqiptarë janë dënuar për vepra penale që lidhen me drogën ose vjedhjet. Duke iu referuar Agjencisë Kombëtare të Krimit (NCA), gazeta thekson se grupet kriminale shqiptare kanë marrë një rol dominues në kultivimin e kanabisit në Britani, duke zëvendësuar vietnamezët si furnizuesit kryesorë vendas të kësaj droge.
Sipas NCA-së, grupet shqiptare, të cilat më parë ishin të përqendruara te trafiku i kokainës, janë orientuar drejt kultivimit të kanabisit për shkak të fitimeve të larta dhe rrezikut më të ulët. Në artikull thuhet gjithashtu se rritja e numrit të emigrantëve shqiptarë që kaluan Kanalin Anglez në vitin 2022 ka krijuar një burim të gatshëm punëtorësh të paligjshëm për kultivimin e kanabisit në ambiente të përshtatura.
