Një tjetër skandal financiar duket se po del në pah, këtë herë i lidhur me vëllain e kryeministrit Edi Rama. Bëhet fjalë për aktivitetin e kompanisë “Euro Garden” Sh.p.k, e themeluar në vitin 2018 nga Olsi Rama në bashkëpunim me shtetasin Fation Shehu.
Kompania, e regjistruar me kapital fillestar 100 mijë lekë dhe me ndarje aksionesh 49% me 51%, ka si objekt krijimin e hapësirave të gjelbra, furnizimin me lule dhe dekorimin e ambienteve publike e private. Por sipas të dhënave, aktiviteti real financiar i saj ngre pikëpyetje të forta.
Burime të ndryshme pretendojnë se “Euro Garden” ka përfituar rreth 6 milionë euro në 8 vite, kryesisht nga institucione shtetërore si Kryeministria, ministritë, bashkitë dhe agjenci të ndryshme publike. Furnizime me lule dhe dekorime në aktivitete zyrtare rezultojnë të jenë bërë në mënyrë të vazhdueshme.
Megjithatë, në të dhënat e Qendra Kombëtare e Biznesit dhe në sistemin e tatimeve, rezulton se kompania nuk ka deklaruar asnjë të ardhur për disa vite. Bilancet financiare janë dorëzuar vetëm për periudhën 2020-2022, ku në dy vite raportohen humbje, madje më të larta se vetë xhiroja – një tjetër element që shton dyshimet.
Ligji kërkon transparencë të plotë për çdo aktivitet ekonomik, përfshirë të ardhurat, shpenzimet dhe kontratat publike. Por për vitet 2018-2019 dhe 2023-2025, mungon çdo deklarim nga kjo kompani.
Një tjetër zhvillim i dyshimtë është edhe transferimi i 51% të aksioneve në vitin 2022 nga Fation Shehu tek një punëtor i thjeshtë i kompanisë, ndërsa vetë ish-ortaku mbetet i punësuar në të njëjtin biznes.
Ndërkohë, institucionet si Tatimet dhe organet përgjegjëse nuk kanë ndërmarrë asnjë veprim të dukshëm ndaj këtij rasti, duke ngritur pyetjen që po qarkullon gjithnjë e më shumë: pse ky aktivitet nuk kontrollohet?
Skandali bëhet edhe më i ndjeshëm për shkak të lidhjeve familjare me pushtetin, duke rikthyer në vëmendje debatin mbi transparencën, konfliktin e interesit dhe kontrollin e parasë publike në Shqipëri.
