Presidentja e Kosovës, Vjosa Osmani, ka nxjerrë këtë të premte dekretin për shpërndarjen e Kuvendit dhe ka shpallur zgjedhjet e reja.
Në një konferencë për mediat, Osmani theksoi se këtë situatë e sollën sipas saj njerëz të papërgjegjshëm dhe me qëllime të rrezikshme, ndërsa shtoi se do të konsultohet edhe me partitë politike për mbajtjen e zgjedhjeve.
“Në përputhje me nenin 82 dhe 86 të Kushtetutës së Republikës së Kosovës kam vendosur ta shpërndaj Kuvendin e Republikës së Kosovës dhe të shpallë zgjedhjet e reja pas konsultimeve të cilat do t’i mbaj me partitë politike. Qytetarët s’kanë dashur zgjedhje, këtë situatë e ka krijuar dështimi i Kuvendit për ta kryer detyrën e tyre kushtetuese. Askush s’do duhet të dëshironte një cikël tjetër politik, sidomos në këtë periudhë kur vendi ka nevojë për stabilitet, por këtu e sollën vendin njerëz të papërgjegjshëm dhe me qëllime të rrezikshme“, tha Osmani.
