Gjykata italiane ka dhënë vendime dënimi ndaj një grupi prej 14 personash të akuzuar për drogë, armë dhe zhvatje, mes të cilëve edhe Elvis Demçe. Pas shqyrtimit me procedurë të shkurtuar, Demçe është dënuar me 11 vjet e 4 muaj burg.
Vendimi i sotëm i shtohet një dënimi të mëparshëm prej 15 vjet e 4 muajsh, tashmë i formës së prerë për trafik droge. Përveç tyre, autoritetet kanë regjistruar edhe dy marrëveshje për pranimin e fajësisë, ndërsa 12 të pandehur të tjerë do të përballen me gjykimin e rregullt.
Sipas mediave italiane, Demçe aktualisht ndodhet në burgun e Sassar-it, ku po mbahet nën regjimin e posaçëm 41-bis. Ai cilësohet si i pari shqiptar dhe italo-shqiptar i vendosur nën këtë regjim të ashpër.
Ndaj Demçes vijojnë edhe procedura të tjera penale, përfshirë një dënim jo përfundimtar prej 18 vjetësh e gjysmë, që lidhet me akuzat për tentativë vrasjeje në vitin 2020 në zonën e Acilias në Romë, ku mbeti i plagosur me armë zjarri 45-vjeçari Alessio Marzani.
