Gjykata Kushtetuese ka zbardhur këtë të hënë vendimin për rikthimin në detyrë të kryebashkiakut të Tiranës, Erion Veliaj, duke e cilësuar shkarkimin e tij si antikushtetues.
Sipas vendimit, Gjykata Kushtetuese ka shfuqizuar vendimin e datës 25.09.2025 të Këshillit të Ministrave për shkarkimin nga detyra të Veliaj, duke e vlerësuar si të papajtueshëm me Kushtetutën e Republikës së Shqipërisë.
Në arsyetimin e vendimit thuhet ndër të tjera se Këshilli i Ministrave nuk ka analizuar shkakun e mungesës në detyrë për 3 muaj të Veliajt.
“Vendimi i Këshillit të Ministrave, i mbështetur vetëm në faktin e mungesës tremujore në detyrë, nuk ka analizuar shkaqet, rrethanat dhe as ndikimin e kësaj mungese në ushtrimin e funksioneve, duke mos vlerësuar nëse situata ka ardhur si pasojë e veprimeve apo mosveprimeve të vetë kryetarit dhe nëse ajo mund të cilësohej shkelje e rëndë e Kushtetutës ose e ligjit.
Megjithatë, theksohet se mosparaqitja në detyrë për një periudhë të pandërprerë tremujore mund të përbëjë shkelje të rëndë në ushtrimin e detyrës nga kryetari i bashkisë, por vetëm në rastet kur ai mban përgjegjësi për këtë situatë. Ndryshe nga rasti konkret, kërkuesit nuk i është atribuuar asnjë përgjegjësi juridike. Në këtë kontekst, shkelja e rëndë lidhet me mospërmbushjen thelbësore të detyrës me vullnetin e tij, duke pasur parasysh se kryetari i bashkisë është një organ ekzekutiv monokratik”,- thuhet në vendimin e Gjykatës.
