Një qytetar nga Kamza ka denoncuar gjendjen e rënduar të infrastrukturës në qytet, duke ndarë përvojën e tij të pakëndshme në rrugën kryesore përballë Bashkisë.
Ai në një denoncim që ka bërë tek redaksia e Maska.al, tregon se makina e tij pësoi dëmtime pasi gomat u çanë nga gropat e shumta në asfalt.
“Sot në rrugën kryesore përballë Bashkisë së Kamzës kam çarë gomen e makinës në gropat që janë hapur në asfalt. Kjo rrugë dhe pothuajse të gjitha rrugët e Kamzës janë në gjendje katastrofike. Kompanitë çdo 6 muaj marrin fonde dhe vendosin shtresa ‘asfalti’ që nuk zgjasin asnjë muaj, deri sa të hapen gropat sërish. Askush nuk mban përgjegjësi për punën që bën dhe askush nuk i kontrollon. Ky vend po bëhet i pabanueshëm”, shkruan qytetari.
Banorët e Kamzës prej kohësh ankohen për mungesën e mirëmbajtjes së rrugëve dhe për punimet e dobëta që përsëriten çdo vit me fonde publike, por pa zgjidhje afatgjatë. Deri më tani, Bashkia Kamëz nuk ka dhënë asnjë reagim lidhur me këto shqetësime.
