Sipërmarrësi Ardian Takaj, i njohur edhe si pronar i klubit të futbollit “Skënderbeu”, tentoi të shpëtojë një godinë pa leje brenda resortit “Tropikal” në Durrës, nëpërmjet një mase urgjente sigurimi. Por, tentativa e tij dështoi, pasi gjykata administrative e Tiranës konstatoi se Takaj nuk arriti të paraqiste asnjë provë se prishja e ndërtesës pa leje do t’i sillte dëm të pariparueshëm.
Vendimi është marrë nga gjyqtari administrativ Mirjan Mustafaj. Ai shqyrtoi kërkesën e shoqërisë “FT Managments & Events”, pronare të “Tropikal”, e cila zotërohet nga Gerhard Takaj, djali i Ardian Takaj.
Sipas padisë, vendimi i Inspektorati i Mbrojtjes së Territorit (IMT) i Bashkisë së Durrësit për prishjen e godinës do të sillte pasoja të rënda dhe të pariparueshme, pasi kompania menaxhuese ka lidhur kontratë shërbimi me shoqërinë e njohur botërore në fushën e hotelerisë, “Melia”.
Në vlerësimin e paditësit, vendimi i IMT për prishjen e godinës do të dobësonte reputacionin dhe do të ndikonte drejtëpërdrejtë në kontratën me kompaninë ndërkombëtare.
Megjithatë, gjykata administrative konstatoi se argumentat e paraqitur nga Takaj nuk përbënin elementë që konsiderohen nga ligji si të mjaftueshëm për të pezulluar vendimin e prishjes së objektit, të konstatuar pa leje.
Në vendimin e konsultuar nga “Boldnews.al”, gjykata shprehet se “nuk plotësohen kushtet dhe rrethanat ligjore për pranimin e kërkesës së palës kërkuese për marrjen e masës së sigurimit të padisë. Ndaj, Gjykata arrin në përfundimin se, kërkesa e palës kërkuese për marrjen e masës së sigurimit të padisë, është e pabazuar nëligj e në prova dhe si e tillë duhet refuzuar”.
Policia “toleroi” Ardian Takaj
Historia problematike e Takajt nisi në mesin e gushtit 2025. Inspektorët ndërtimorë të Bashkisë së Durrësit dhe Policia e qytetit bregdetar zhvilluan një vizitë kontrolli pranë resortit bregdetar “Tropikal”, në zonën e Plepave.
Në 13 Gusht 2025, në sallën operative të Policisë së Durrësit kishte mbërritur një informacion se kompania “FT Management & Events” e Gerhard Takaj, djalit të biznesmenit Ardian Takaj, po kryente ndërtim pa leje brenda kompleksit “Tropikal”.
Kjo telefonatë mbërriti në kohën që strukturat policore dhe ndërtimore u angazhuan në kulmin e vapës së verës për të zbuluar paligjshmërinë në terren, bazuar në një urdhër publik të kryeministrit Edi Rama.
Nga verifikimi në terren të zhvilluar në 14 Gusht, forcat policore dhe ato të Inspektoratit Ndërtimor të Durrësit konstatuan punime pa leje në një godinë dy-katëshe. Policia arrestoi në flagrancë shtetasin S.D, pronar i një kompanie ndërtimi, e cila ishte nënkontraktuar për kryerjen e punimeve në ndërtesën dy-katëshe.
Ndërkohë, forcat policore nuk raportohet të kenë kryer asnjë veprim procedurial penal ndaj Ardian Takaj dhe djalit të tij, Gerhard Takaj, të cilët janë përfituesit e drejtëpërdrejtë të godinës që vlerësohet pa leje nga organet shtetërore.
Godina pa leje
Oficerët e Policisë konstatuan se objekti ishte rreth 240 metra katrorë, i rrethuar me skela metalike. Në brendësi të objektit kishte konstruksione metalike dhe kolona betoni, ndërsa kati i dytë ishte mbuluar me konstruksion metalik dhe panele sanduiç.
Pas këtij konstatimi, punonjësit e policisë kanë pyetur shtetasin S.D., me profesion inxhinier, i cili është pronar dhe administrator i kompanisë “A…” shpk, e cila ishte kontraktuar për të kryer punimet ndërtimore brenda kompleksit “Tropikal”.
Ai sqaroi se kishte marrë përsipër punime rifiniture, rikonstruksioni dhe termoizolimi të godinave ekzistuese, mbi bazën e një njoftimi punimesh të lëshuar nga Njësia Administrative nr. 5, Bashkia Durrës.
Sipas tij, punimet e kryera nuk kishin tejkaluar objektin e dakordësuar dhe nuk kërkonin pajisje me leje ndërtimi, pasi hynin në kategorinë e ndërhyrjeve që nuk sjellin rritje të volumit ndërtimor. Ai shtoi se ditën e konstatimit, në objekt ndodheshin tre-katër punëtorë të punësuar prej tij, të cilët po kryenin punime mirëmbajtjeje dhe suvatimi.
Në kuadër të hetimit paraprak, shërbimet e policisë gjyqësore kanë pyetur në cilësinë e personit që ka dijeni për veprën penale shtetasin Ardian Takaj.
Ai ka deklaruar se “ndërhyrjet dhe punimet e kryera në objektin në fjalë ishin rrjedhojë e njoftimit të punimeve nr. 1019, datë 02.12.2024, të cilat kishin si qëllim ruajtjen dhe rritjen e efikasitetit tës trukturave ekzistuese, zëvendësimin dhe riparimin e mbulesës së çatisë, si dhe ndërhyrje në riparimin dhe zëvendësimin e pajisjeve të amortizuara në godinat ekzistuese”.
Takaj ka deklaruar para oficerëve të Policisë se godinat kanë ekzistuar që para viteve ’90 dhe kanë kaluar në pronësi të Shoqërisë “Tropikal SM&FT”sh.p.k, shoqëri e krijuar më 01.12.2024, me ortakë Sindikatën e Pavarur të Minatorëve të Shqipërisë (20% të aksioneve) dhe Shoqërinë “FT Management &Events” sh.p.k, (80% të aksioneve).
Biznesmeni ka shtuar se godinat ishin të amortizuara dhe ishte kërkuar kryerja e punimeve që nuk shtonin volum në ndërtim dhe për të cilat nuk ishte e nevojshme leja e ndërtimit.
IMT rrëzon Takaj
Në kuadër të hetimit paraprak, është administruar në cilësinë e provës dokumentare “akti i konstatimit” nr.9, datë 14.08.2025 i Inspektoratit të Mbrojtjes së Territorit pranë Bashkisë Durrës.
Në atë akt thuhet se ndërtimi është kryer pa lejen përkatëse të organeve kompetente. Inspektorët Ndërtimorë kanë vlerësuar se “ndërtimi i kryer ka një sipërfaqe totale prej 1630m², i realizuar me konstruksione betoni dhe hekuri, si dhe me panele sanduiç metalike. Ky ndërtim, me destinacion biznesi dhe përfitimi, se është kryer pa dokumentacion të vlefshëm ligjor dhe pa lejen përkatëse të ndërtimit”.
Me këtë akt-konstatimi në dorë, oficerët e Policisë së Durrësit kanë vepruar me arrestimin në flagrancë të inxhinierit S.D, nën dyshimet se ka konsumuar veprën penale të “Ndërtimit të paligjshëm”, për qëllime përfitimi, parashikuar nga neni 199/a, paragrafi 3 i Kodit Penal.
