Shefi i Komisariatit të Përmetit, Dhurim Çenko, është pezulluar nga detyra pas dyshimeve se kishte dijeni për rastin e rëndë të abuzimit seksual të një 16-vjeçareje nga njerku i saj dhe një efektiv policie.
Nga hetimet ka rezultuar se në këtë histori janë përfshirë katër persona. Tre prej tyre janë arrestuar, ndërsa një tjetër është shpallur në kërkim.
Në pranga ka rënë P. B., 55 vjeç, punonjës i Komisariatit të Përmetit, i cili akuzohet se ka abuzuar seksualisht me të miturën për rreth tre vite, e cila ishte thjeshtra e tij.
Gjithashtu, Kristian Prifti, 46 vjeç, me të cilin vajza dyshohet se kishte një lidhje, dhe shoku i tij Isi Pasho, 27 vjeç, janë arrestuar pasi kanë kanosur policin 55-vjeçar duke i kërkuar 1 milion lekë për të mos publikuar video me përmbajtje intime.
Ndërkohë, Artur Ago, 53 vjeç, punonjës policie dhe koleg i njerkut të vajzës, është shpallur në kërkim ndërkombëtar pasi dyshohet se është larguar drejt Greqisë. Pikërisht një video intime e tij, që i ishte dërguar vajzës, u përdor më pas për shantazh nga i dashuri i 16-vjeçares.
