Fitorja e 11 majit nga Partia Socialiste, theu rekordin e mëparshëm të vendosur po prej saj, duke numëruar 4 mandate radhazi.
Këto zgjedhje janë kundërshtuar nga opozita, e cila i konsideron si farsë elektorale, teksa në raportin paraprak të OSBE/ODIHR, një ditë pas zgjedhjeve parlamentare të 11 majit, citohet se gara zgjedhore në Shqipëri ishte “e pabarabartë” për shkak të “keqpërdorimit masiv të burimeve shtetërore dhe pushtetit institucional nga partia në pushtet” si dhe nga mungesa e medias së pavarur, e cila nuk siguroi që votuesit të ishin të mirëinformuar mbi zgjedhjen që bënë.
Krahas kësaj para zgjedhjeve janë publikuar denoncime të panumërta, ku punonjësve të administratës u bëhet presion për të votuar për Partinë Socialiste, nëse duan të mbajnë vendin e punës.
Por tashmë zgjedhjet mbaruan, KQZ shpërndau mandatet, dhe pritet konstituimi i parlamentit të ri. E në të tillë situatë ngrihet pikëpyetje se çfarë po ndodh me ata që janë kërcënuar, apo edhe me ata të cilëve u është premtuar vend pune në këmbim të votës.
Një situatë e rëndë dhe e vështirë paraqitet në një prej institucioneve publike, ku drejtuesi i saj është ndërruar më pak se 3 muaj para zgjedhjeve. Bëhet fjalë për Drejtorinë e Përgjithshme të Metrologjisë, ku ka nisur një reprezalje ndaj punonjësve të ndryshëm.
Burime pranë këtij institucioni bëjnë me dije se shumë prej punonjësve, me ardhjen e drejtoreshës së re, u është kërkuar dorëheqja në grup, e për kryeneçët, po ngrihen komisione disipline, për ti ndëshkuar për mosbindjen e tyre. Të njëjtat burime bëjnë me dije se ka patur prej atyre që u është kërkuar dorëheqja, por më pas, pas bindjes e nënshtrimit ndaj drejtoreshës së re, ata janë parë me një sy tjetër, dhe i kanë mbajtur në punë.
Në krye të këtij institucioni qëndron Alkida Llakaj, vajza e aktorit të humorit Agron Llakaj, e emëruar në mars të këtij viti, që është shndërruar në tmerrin e Drejtorisë së Përgjithshme të Metrologjisë, që çdo ditë pritet të ‘presë’ një kokë të radhës nga ky institucion, fundja shumë kujt u është premtuar vend pune, e do të duhet të mbahet fjala e dhënë.
Punonjësit bëjnë me dije se gjatë të gjithë punës së tyre janë munduar të ndjekin rregullat dhe t’i binden eprorëve dhe parashikimeve të kontratës për punën e tyre, dhe se edhe nëse ka ndonjë rast të diskutueshëm, gjithçka vjen si pasojë e zbatimit të urdhrave e direktivave të eprorëve.
Tashmë me ardhjen në këtë drejtori të vajzës së Agron Llakajt, kryeneçëve u është treguar rruga. Po ashtu në të tilla kushte disa prej punonjësve kanë bërë kërkesë në DAP, që të mund të lëvizen nga ky institucion për në një tjetër.
Po ashtu zëra në këtë institucion bëjnë me dije, se drejtuesve që kanë iniciuar komisionet disiplinore ndaj punonjësve që s’kanë pranuar të japin dorëheqje, u është premtuar të bëhen drejtorë drejtorishë brenda këtij institucioni.
Teksa në një institucion normal, drejtori i ri do të përpiqej të bashkëpunonte me stafin e të krijonte një frymë pozitive, duke rregulluar edhe ato gjëra që nuk shkonin me drejtuesit e mëparshëm, punonjësit shprehen se gjithçka u është kthyer në një makth, pasi janë gjithë kohës të shqetësuar se kur do të ju kërkohet dorëheqje, me presion e jo vetëm.
Vajza e një aktori që mbërthen çdokënd para televizorit, duke u larguar streset e dhënë pozitivitet, bën të kundërtën e të atit, me vartësit e vet.
