Poeti i ri Kastriot Çupi, me origjinë nga Mati dhe banues prej vitesh në Londër, ka sjellë deri tani dy libra poetikë që pasqyrojnë ndjeshmërinë dhe përjetimet e tij.
Pas vëllimit të parë “Pasqyra e shpirtit tim”, ai vjen para lexuesve me librin më të ri, “Malli i mërgimtarit”.
Ky vëllim përmban rreth 170 poezi, ku lexuesi gjen mallin e mërgimit, dashurinë për atdheun, emigrimin masiv, nënën, por edhe figurat e mëdha kombëtare si Skënderbeu, Nënë Tereza, Adem Jashari e Isa Boletini.
Përmes vargjeve të tij, Çupi sjell një pasqyrë të realitetit shqiptar ndër vite, duke i dhënë zë emocioneve dhe dhimbjeve të shpirtit të një mërgimtari.
Libri do të promovohet në Panairin e Librit, ku lexuesit do të kenë mundësinë ta prekin nga afër dhe të njihen më shumë me krijimtarinë e një autori të ri që e kthen mallin dhe nostalgjinë në poezi.
Ai tregon se pasioni për poezinë i ka lindur që në vitin 2001, kur e frymëzonin kujtimet dhe nostalgjia për fëmijërinë. Jeta në mërgim, që nisi në moshë të re, ka qenë shtylla kryesore që e ka nxitur të shkruajë.
Për librin e parë “Pasqyra e shpirtit tim”, ai shprehet se aty ka derdhur gjithçka ka ndjerë shpirti i tij – mallin, ankthin, brengat. Ai e quan ndjenjën shpirtërore si pasqyra që ka reflektuar çdo gjë.
Ndërsa pjesëmarrjen e tij këtë vit në Panairin e Librit e cilëson si një ndjesi të jashtëzakonshme dhe një privilegj për t’u njohur me shkrimtarë të tjerë.
Duke folur për librin më të ri, poeti thotë se frymëzim i tij është nostalgjia dhe braktisja masive e shqiptarëve, ku faktor kryesor mbetet keqpërdorimi i politikës.
Sipas tij, lexuesi në këtë vëllim do të gjejë realitetin jetësor të shqiptarëve ndër dekada, por edhe histori kombëtare të pasqyruara përmes figurave si Skënderbeu, Nënë Tereza, Adem Jashari dhe Isa Boletini.
Vëllimi përmban rreth 170 poezi, ku trajtohen tema të tilla si mërgimi, dashuria për vendin, emigrimi masiv, dashuria për nënën dhe dashuria si vlerë njerëzore.
Një nga poezitë e tij të preferuara është “Veç dy fjalë”, ku shkruan:
*Veç dy fjalë po du me i than / Që për jetë të mbahen n’letër / Kush nuk vdes për vatan / Nuk mund vdes për asgjë tjetër.*
Çupi beson se letërsia ka fuqi të madhe për të shëruar plagët shpirtërore, megjithëse, sipas tij, arti dhe shkrimi nuk vlerësohen sa duhet sot. Ai e sheh pasionin për të shkruar si një urë që e lidh me lexuesin shqiptar edhe pse jeton larg. Poetët që e kanë frymëzuar janë Dritëro Agolli, Ali Asllani, Visar Zhiti e Agim Doçi.
Mesazhi që ai dëshiron t’u përcjellë lexuesve në Panairin e Librit është që të lexojnë më shumë libra dhe më pak lajme politike, pasi librat pasqyrojnë realitetin dhe jo propagandën.
