Kompania që është mbajtëse e kontratës konceisonare të Aeroportit të Kukësit “GLOBAL TECHNICAL MECHANICS” sh.p.k u licencua së fundmi nga Enti Rregullator i Energjisë në prodhim dhe furnizim.
Ky miratim erdhi pas kërkesës së subjektit dhe lidhet specifikisht me një projekt fotovoltaik që kompania po zbaton pranë aeroportit në Veri të vendit dhe që sipas kushteve të vendosura nga Enti Rregullator duhet të nisë prodhimin Brenda këtij viti.
Vendimi nënvizon se Bordi vendosi “të licencojë shoqërinë “GLOBAL TECHNICAL MECHANICS” sh.p.k. në veprimtarinë e prodhimit të energjisë elektrike nga centrali fotovoltaik, me kapacitet prodhues 12 MW, me vendndodhje në zonën e Aeroportit të Kukësit, Njësia Administrative Shtiqen, Bashkia Kukës, Qarku Kukës, për një afat 25-vjeçar”, thuhet në vendim.
I njëjti specifikon se shoqëria duhet të fillojë ushtrimin e veprimtarisë së prodhimit të energjisë elektrike brenda datës 31.12.2025.
Enti nënvizon se në referencë të përcaktimeve të nenit 10 të kontratës së nënshkruar me MIE-n vlerësohet që shoqërisë t’i lihet kusht që me fillimin e operimit/ushtrimit të veprimtarisë së prodhimit të energjisë elektrike, por jo më vonë se 60 ditë nga ky fakt, të depozitojë në ERE dokumentacionin përkatës për testimin e veprës
Sa i takon licencës së furnizimit me energji ajo i është dhënë kompanisë për një afat 5 vjeçar.
Kompania koncesionare
Në mars të vitit 2019 Këshilli i Ministrave miratoi kontratën koncesionare për Aeroportin e Kukësit.
Procedura e tenderimit u krye në dhjetor të vitit 2018 dhe fitues doli bashkimi i përkohshëm i kompanive Global Technical Mechanics sh.p.k (tashmë zotëron 100% të aksioneve prej shtatorit 2022) dhe Bami sh.p.k. Kohëzgjatja e koncesionit është 35 vite. Vlera e rehabilitimit ishte rreth 8 milionë euro.
