Kryetari i Partisë Demokratike, Sali Berisha, ka hedhur një akuzë të rëndë gjatë deklaratës së tij përpara SPAK, duke thënë se drejtori i komunikimit në Kryeministri, Endri Fuga, është arratisur.
Sipas Berishës, arratisja e Fugës ka ndodhur pas dëshmisë së tij në Prokurorinë e Posaçme lidhur me restorantin “The Home”, i cili ndodhet në Pazar të Ri në Tiranë. Restoranti është në pronësi të përbashkët të bashkëshorteve të Fugës dhe të ish-zv.kryetarit të Bashkisë së Tiranës, Arbjan Maznikut.
Berisha ka ngritur dyshime se një artikull i publikuar kohë më parë kundër tij ishte i porositur nga Endri Fuga, duke theksuar se ai është thirrur në SPAK pikërisht për këtë çështje. “A e dini se u thirr këtu për restorantin e tij dhe ia mbathi. Ku janë mediat, shtroj pyetjen unë?”, tha Berisha.
Deklaratat i bëri për gazetarët në dalje nga SPAK, ku u paraqit në zbatim të masës së sigurisë vendosur ndaj tij për dosjen “Partizani”.
“Dhe në atë deklaratë, të shkruar në zyrat e Endri Fugës që më duket se… a dini gjë ku është Endri Fuga? Më thoni pak. Si nuk guxoni të thoni një fjalë për të arratisurit? A e dini se u thirr këtu për restorantin e tij dhe ia mbathi. Ku janë mediat, shtroj pyetjen unë? Pra, shkrim i porositur nga Endri Fuga. Më 4 mars pra deklarata që më anatemonin mua me të gjitha epitetet. KLGJ me një pasion të madh shumë”, tha Berisha.
