Tenderi për ndërtimin e Unazës së Re të Tiranës (Kashar–Vaqarr–Mullet), Faza I, që synon të lehtësojë trafikun në qendër të qytetit, është fituar nga kompania 4 A-M. Kjo kompani rezulton në pronësi “me letra” të Ardit Metaliaj, por në fakt sipas mediave lidhet me oligarkun Bashkim Ulaj.
Autoritet Prokurues është Autoriteti Rrugor Shqiptar i drejtuar nga Gentian Gjyli.
Vlera fituese e tenderit është 2,629,609,230.62 lekë të reja pa TVSH ose rreth 32 milionë euro me TVSH nga një fond limit prej 3,332,478,923.12 lekë të reja pa TVSH ose rreth 41 milionë euro me TVSH, që përfaqëson rreth 78.9% të fondit limit.
Tenderi ishte i hapur dhe mbi kufirin e lartë monetar, por u etikua me flamur të kuq, pasi të gjithë ofertat e tjera u skualifikuan. Kishte oferta me çmime më të ulëta, por që “çuditërisht” nuk plotësonin kushtet teknike dhe administrative, dokumentacion i paplotë, kualifikime të papërshtatshme ose mosrespektim i specifikimeve të projektit.
Objektivi i projektit është ndërtimi i rrugës që lidh Kasharin me Vaqarrin dhe Mulletin, duke krijuar një alternativë për të shmangur trafikun e tranzitit në qendër të Tiranës. Përfitues të nënprojektit janë Ministria e Infrastrukturës dhe Energjisë dhe Autoriteti Rrugor Shqiptar (ARR). Projekti zbatohet në kuadër të Kornizës së Investimeve në Ballkanin Perëndimor (WBIF), me financim nga buxheti i shtetit.
Sipas të gjitha gjasave, plot 32 milionë euro nga xhepat e shqiptarëve do të shkojnë për të pasuruar akoma më shume oligarkun Ardit Metaliaj dhe bossin e tij, Bashkim Ulaj.
