Partia Demokratike ka ngritur akuza ndaj kompanisë ajrore “Air Albania”, duke deklaruar se “krenaria kombëtare” e shpallur nga kryeministri Edi Rama, po shkon drejt falimentimit. Kjo deklaratë vjen pas anulimit të fluturimeve direkte mes Tiranës dhe Lubjanës, vetëm dy muaj pas njoftimit.
Zëdhënësja e Antikorrupsionit në PD, Genta Vangjeli, theksoi se kompania ka publikuar vetëm bilancin e vitit 2018 dhe që prej atëherë nuk ka ofruar asnjë pasqyrë financiare. Kjo fshehje, sipas opozitës, ngre dyshime të forta për një krizë të thellë financiare.
Vangjeli e lidhi këtë situatë me shpenzimet e mëdha të udhëtimeve të kryeministrit Rama me avionë charter, një praktikë që opozita e ka kundërshtuar vazhdimisht dhe për të cilën ka kërkuar një komision hetimor. Kjo kërkesë u rrëzua nga mazhoranca në Kuvend.
PD kërkon tani përgjigje nga kryeministri dhe kompania “Air Albania” për të sqaruar nëse “shpenzimet e papërballueshme” nga udhëtimet e Ramës janë shkaku i vërtetë i problemeve financiare të kompanisë. Anulimi i linjës me Slloveninë, sipas opozitës, shërben si një tregues i qartë i gjendjes së vështirë ku ndodhet kompania.
Deklarata
“Më 20 Qershor Air Albania e shpallur nga KM Edi Rama si ‘krenaria kombëtare’ njoftoi nisjen e fluturimeve direkte mes Tiranës dhe Lubjanës, duke rilidhur Shqipërinë dhe Slloveninë pas disa vitesh. Por dy muaj më pas, më 20 Gusht, mediat Sllovene informuan publikun se kompania i anuloi planet për këtë linjë për shkak të vështirësive financiare. Dhe kjo nuk është aspak çudi”, tha Vangjeli.
“Air Albania, themeluar në vitin 2018 me 10% pronësi shtetërore përmes Albcontrol ka dorëzuar në QKB vetëm bilancin e saj për vitin e parë të operimit (2018), më pas asnjë publikim lidhur me pasqyrat financiare të kësaj shoqërie. Mungojnë gjithashtu të dhëna për vendime gjyqësore dhe njoftime zyrtare nga përmbarues privatë për detyrimin miliona euro të Air Albania kundrejt palëve të treta. Kjo fshehje ngre dyshime për krizën e thellë financiare të kompanisë”, shtoi.
“Ndërkohë, që prej 2020-s, Air Albania ka lidhur një marrëveshje bashkëpunimi me Drejtorinë e Përgjithshme të Shërbimeve Qeveritare për ofrimin e shërbimit të fluturimeve të posaçme charter për KM e RSH. Opozita ka kërkuar transparencë dhe një komision hetimor për udhëtimet e Kryeministrit me charter, por kjo u rrëzua nga mazhoranca. Sot kërkojmë që Kryeministri dhe kompania të japin përgjigje: a po shkon drejt falimentimit ‘krenaria kombëtare’ për shkak të shpenzimeve të papërballueshme që vijnë nga udhëtimet charter të Edi Ramës”, përfundoi ajo.
