Qendra e shpërdorimit të fondeve publike tek Ujësjellës-Kanalizime Tiranë (UKT) duket se ka një “personazh të veçantë”: të ashtuquajturën “hirushja” e drejtorit Skerdi Drenova. Ajo është emëruar fillimisht në OST dhe sot ka përfunduar në strukturën e UKT-së, si njeriu më i besuar i drejtorit.
Nga punonjëse e OST në sekseren e UKT-së
Burime për Publik.al konfirmojnë se J.N. është personi që ndërmjetëson për punësimet dhe ndikon drejtpërdrejt në shpërndarjen e tenderave, duke u shndërruar në hallkën kyçe të Drenovës. Por më e habitshme është jeta e saj luksoze, krejtësisht e pashpjegueshme për një pagë mujore prej vetëm 85 mijë lekësh.
Nga punonjëse e OST-së, sot ajo rezulton pronare e një biznesi me NIPT M02509001P, që zyrtarisht funksionon si agjenci turistike, agjent i kompanisë EasyPay, ofrues transporti dhe dhënës me qira makinash. Një “ombrellë biznesesh” që sipas burimeve dyshohet se shërben për pastrimin e parave të tenderave korruptivë.
Këto indicie, që në çdo vend normal do të ishin objekt i një hetimi nga SPAK, vazhdojnë të injorohen.
Luks për “Hirushen”, varfëri për qytetarët
Ndërsa qytetarët e Tiranës përballen çdo ditë me mungesë uji dhe fatura të papërballueshme, në zyrat e UKT-së mbretëron korrupsioni, arroganca dhe shpërdorimi.
Drenova ka propozuar një strukturë të re në UKT ku “hirushja” e tij do të emërohet Drejtoreshë Kabineti, ndërsa në të njëjtën kohë do të shkurtohen rreth 200 punonjës nga puna.
“Princi dhe Hirushja”
Burimet pohojnë se udhëtimet e saj të shpeshta në muajt maj-qershor janë kthyer në rutinë. Në zyrat e UKT-së, Drenova dhe J.N. mbyllen për orë të tëra me çelës, duke e kthyer institucionin në pronë private.
Ajo është jo vetëm e dashura, por edhe sekserja e tij për tenderat. Ndërkohë që 6 koordinatorë, 6 këshilltarë dhe 4 nëndrejtorë nuk shfaqen fare në punë, por vijojnë të marrin rroga rregullisht. Ka raste të nëndrejtorëve që kanë dalë në pension dhe vazhdojnë të figurojnë në listëpagesa.
Skema e institucionalizuar e korrupsionit
E gjithë kjo panoramë, nga punësimet klienteliste, tek bizneset e dyshimta të hirushes, deri tek zhdukja e fondeve publike, e kthen UKT-në në një model të pastër të korrupsionit të institucionalizuar.
Por ndërsa institucionet shtetërore heshtin, qytetarët mbeten viktimat e një sistemi ku paratë e tyre përdoren për luksin e një drejtori dhe “hirushes” së tij.
