Detaje të reja kanë dalë në dritë lidhur me ngjarjen e rëndë në fshatin Madhesh të Ulëzës në Mat, ku 23-vjeçari Renis Dobra u gjet pa shenja jete pranë liqenit të Shkopetit. Fotografia e viktimës është publikuar tashmë nga mediat.
Burime pranë grupit hetimor kanë bërë me dije se gjatë ekzaminimit të trupit të viktimës janë konstatuar shenja mavijosje në pjesën e qafës. Këto shenja ngrenë dyshime të forta se 23-vjeçari mund të jetë mbytur me duar, litar ose tel. Megjithatë, shkaku përfundimtar i vdekjes do të përcaktohet nga autopsia e Institutit të Mjekësisë Ligjore. Pavarësisht kësaj, pista kryesore ku po vijojnë hetimet është ajo e vrasjes.
Renis Dobra, sipas të dhënave, nuk ka precedentë të rënda kriminale, por rezulton të ketë qenë autor i disa vjedhjeve të thjeshta në të kaluarën. Hetuesit dyshojnë se 23-vjeçari mund të jetë rrëmbyer përpara se të mbytej nga personat përgjegjës për krimin.
Babai i viktimës, Rufat Dobra, kishte denoncuar zhdukjen e të birit në komisariatin e Matit mbrëmjen e së martës, pasi kishte humbur kontaktet me të. Pas disa orësh kërkime, Renisi u gjet i pajetë pranë liqenit të Shkopetit. Policia fillimisht la të kuptohej se automjeti i tij mund të kishte rënë në liqen, por zbulimi i shenjave të mavijosjes në qafë ka ndryshuar rrjedhën e hetimeve.
Policia ka deklaruar zyrtarisht se është ngritur një grup i posaçëm hetimor dhe, nën drejtimin e Prokurorisë, po punohet intensivisht për zbardhjen e plotë të rrethanave dhe dokumentimin ligjor të këtij rasti të rëndë.
Pamje nga vendi i ngjarjes
