Prej 22 vitesh, taksapaguesit shqiptarë financojnë një institucion që ka për detyrë të kontrollojë pasuritë e zyrtarëve të lartë dhe, në rast të mosdeklarimit apo fshehjes së tyre, të ndërmarrë masa ndëshkuese, përfshirë gjoba administrative dhe kallëzime penale. Por realiteti është krejt tjetër: ILDKPI ka vepruar thuajse vetëm ndaj zyrtarëve të rangut të ulët, ndërsa për funksionarët e nivelit të lartë në qeveri, parlament, drejtësi, polici e institucione të tjera kyçe, nuk ka kryer asnjë hetim pasuror serioz, pavarësisht denoncimeve të shumta publike dhe informacioneve që kanë mbërritur nga agjencitë e hetimit vendas e ndërkombëtare.
Në vend që të penalizojë mosveprimin, qeveria ka zgjedhur ta shpërblejë këtë institucion: jo vetëm që i ka rritur buxhetin çdo vit dhe i ka trefishuar pagat drejtuesve dhe inspektorëve, por ka shtuar edhe numrin e punonjësve, përmes rekrutimeve klienteliste. Evgjeni Bashari, drejtuesja aktuale e ILDKPI-së prej afro pesë vitesh, e ka shfrytëzuar këtë për të punësuar familjarë dhe miq të saj, si dhe për të mbyllur dosjet e zyrtarëve që i garantojnë mbështetje politike.
Së fundmi, më 19 maj 2025, qeveria i akordoi ILDKPI-së një fond shtesë prej 2.2 milionë eurosh, me justifikimin për të shtuar një kat mbi godinën aktuale. Sipas burimeve të siguruara nga “Pamfleti”, ky shtesë kati lidhet me emërimin e 40 inspektorëve të rinj, të cilët do t’i shërbejnë kryesisht interesave politike, jo kontrollit real të pasurive të zyrtarëve.
Tenderi për ndërtimin është regjistruar më 30 maj me nr. reference 49627 dhe është shpallur më 9 qershor, ndërkohë që do të zhvillohet më 17 qershor. Punimet do të kryhen brenda një viti, ndërsa pagesa për kompaninë që do të përzgjidhet do të bëhet në katër këste, të shpërndara deri në vitin 2028. Paralelisht, emërimi i 40 inspektorëve të rinj është planifikuar të ndodhë deri në fund të gushtit, sapo Ministria e Financave të miratojë fondin për pagat e tyre.
Ky zgjerim artificial i administratës së ILDKPI-së ndodh në një kohë kur institucionit i mungojnë rezultatet. Gjatë procesit të vettingut në drejtësi, u provua se znj. Bashari ka falsifikuar raportet për të paktën 137 gjyqtarë e prokurorë, ndërsa për zyrtarët më të lartë të qeverisë, përfshirë ministrat, deputetët dhe zyrtarë të tjerë me pasuri të pajustifikuara, nuk ka nisur asnjë kallëzim penal dhe nuk ka aplikuar asnjë masë ndëshkuese.
Në dhjetor 2020, Evgjeni Bashari u emërua me 100 vota në parlament, si pjesë e një marrëveshjeje mes Edi Ramës dhe Sali Berishës, për të garantuar mosprekjen e dosjeve pasurore të elitës së pushtetit. Sot ajo jo vetëm që po zbaton këtë marrëveshje, por është në garë për të siguruar mandatin e dytë në krye të ILDKPI-së, si shpërblim për heshtjen e saj të gjatë dhe qëllimshme.
Në vend që të jetë një institucion i kontrollit dhe ndëshkimit të korrupsionit, ILDKPI është kthyer në një bunker politik, që mbron më të pushtetshmit në këmbim të privilegjeve, tenderëve dhe postit të radhës./Pamfleti
