Pas fitores së kontestuar të Vangjel Tavos si kryetar i Bashkisë Himarë nën siglën e Partisë Socialiste, duket se pasojat financiare për taksapaguesit kanë nisur të konkretizohen. Një tender publik me vlerë të konsiderueshme – 1.62 miliardë lekë – është shënuar me “flamur të kuq” nga Open Data Albania, një sinjal i qartë për rrezik të lartë abuzimi dhe korrupsioni në procedurë.
Sipas dokumentacionit të prokurimit, objekti i kontratës është përmirësimi i ndriçimit rrugor me llamba LED në qytetin bregdetar. Por, përtej qëllimit teknik të tenderit, vëmendjen e tërheq mënyra e ndarjes së fondeve dhe përzgjedhja e fituesit, që ngre shqetësime serioze për mungesë transparence dhe favorizim.
Tenderi, i zhvilluar më 5 maj 2025, përfshinte vetëm dy operatorë ekonomikë. Por njëri prej tyre – bashkimi i operatorëve “HTM” shpk & “BE-IS” shpk – u skualifikua menjëherë nga komisioni, duke i hapur rrugë të sigurt fitores së kompanisë “A.91” shpk, në pronësi të biznesmenit Dashnor Lazaj, një emër që njihet për lidhjet e tij të afërta me Tavon.
Skualifikimi i ofertës me vlerë më të ulët – një shkelje klasike e konkurrencës së lirë – i ka kushtuar arkës së bashkisë të paktën 44 milionë lekë më shumë. Oferta e kompanisë së skualifikuar ishte 141.6 milionë lekë pa TVSH, krahasuar me 145.3 milionë lekë që u shpallën fituese.
Për më tepër, ekzistojnë dyshime të forta për aftësinë teknike dhe ligjore të kompanisë “A.91” për të kryer këtë kontratë. Nga verifikimi në QKB, rezulton se subjekti nuk ka një licencë aktive të vlefshme nga Ministria e Infrastrukturës dhe Energjisë. Në kushte normale, kjo do ta përjashtonte automatikisht nga gara. Por në Bashkinë Himarë e drejtuar nga Tavo, rregullat duken se vlejnë vetëm për “të tjerët”.
Ky është vetëm një nga shembujt që ngrenë shqetësime serioze për përdorimin e fondeve publike si mjet klientelizmi dhe shpërblimi elektoral. Dhe në këtë rast, fatura bie mbi qytetarët e Himarës dhe buxhetin shtetëror, ndërsa ligji dhe standardet e transparencës mbeten sërish në hije.
