Lufta e fortë e Gerond Meçes për të shtënë në dorë kontratën 7.5 milionë euro për përmirësimin e sistemit informatik të Thesarit të shtetit duket se ka shkuar kot.
Edhe pse Advanced Business Solutions e Meçes paraqiti ofertën më të ulët në tender, Agjencia Kombëtare e Shoqërisë së Informacionit vendosi të shpallë fitues bashkimin e kompanive Communication Progress dhe Horizon në kontratën e majme për sistemin informatik financiar të qeverisë.
Në garën për të marrë tenderin e thesarit u paraqitën subjekte, nga të cilat njëra ishte pa ofertë financiare. Rrjedhimisht dy ofertat e vlefshme në garë ishin ajo e Advanced Business Solutions me vlerë 5.1 milionë euro dhe oferta e dytë ishte e bashkimit të kompanive Communication Progress dhe Horizon, të cilat ofruan 6.8 milionë euro.
AKSHI vendosi të skualifikojë ofertën e ABS-së së Meçes me argumentin se nuk përmbushte kriteret duke shpallur kështu fituese të kontratës ofertën 1.7 milionë euro më të lartë të paraqitur nga Communication Progress dhe Horizon.
Tenderi
Tenderi për përmirësimin e sistemit të Thesarit u shpall në dhjetor të vitit të kaluar. I parashikuar për t’u zhvilluar në Janar sipas afateve ligjore, tenderi u zvarrit për më shumë se 4 muaj për shkak të ankimimeve të Gerond Meçes në Komisionin e Prokurimit Publik duke sfiduar kriteret e vendosura nga AKSHI si jo të drejta dhe jo në përputhje me ligjin.
Përmes një vendimi me numër 451/2025 në prill të këtij viti, Komisioni i Prokurimit i gjeti pjesërisht të drejta ankesat e kompanisë Advanced Business Solutions dhe urdhëroi AKSHI-n të modifikonte kriteret e tenderit. Por pavarësisht kësaj Advanced Business Solutions është skualifikuar sërish dhe kontrata iu dha konkurrentit tjetër.
Për shumë vite rresht ABS e Gerond Meçes ishte fituesi më i madh i tenderave të AKSHI-t duke përlarë miliona euro. Por papritmas, gjatë vitit të kaluar, kompanisë iu pre çdo akses në tenderat e teknologjisë së informacionit dhe që nga ajo kohë, të gjitha ofertat e saj në tenderat e AKSHI-t, skualifikohen.
Gerond Meçe është denoncuar nga opozita si prestanome e familjarëve të kryeministrit. Madje kompania e tij është denoncuar publikisht edhe nga zëvendëskryeministri Arben Ahmetaj si kompani e oborrit kryeministror. Arsyet se pse kjo kompani u përjashtua me urgjencë nga çdo tender i AKSHI-t mbeten mister.
Ndërhyrja
Objekti i përgjithshëm i kësaj kontrate është përmirësimi i infrastrukturës hardware dhe software të Sistemit të Thesarit SIFQ (Sistemi Informatik Financiar i Qeverise), duke e përditësuar atë në mënyre që të jetë i sigurt dhe të plotësoje kërkesat e kohës.
“Qëllimi i këtij projekti është përmirësimi i infrastrukturës hardware dhe softëare të Sistemit të Thesarit SIFQ (Sistemi Informatik Financiar i Qeverisë). Këto përmirësime duhet të rrisin performancën, sigurinë dhe efektivitetin e proceseve të punës. Sistemi që do të përmirësohet dhe zbatohet, duhet të jetë në përputhje me dispozitat e vendimit nr. 945, datë 02.11.2012, Për miratimin e rregullores “Administrimi i sistemit të Bazave të të Dhënave Shtetërore”, të ndryshuar, në lidhje me disponueshmërinë, integritetin dhe konfidencalitetin e sistemit” thuhet në dokumentat e tenderit.
Sipas përshkimeve nga ana palës së kontraktuar duhet të arrihen disa rezultate ku së pari përmirësim i infrastrukturës hardëare (furnizim, instalim, konfigurim).
Së dyti përmirësim i sistemit të thesarit dhe përditësim i tij nga Oracle E-Business Suite R12 (12.1.3) në sistemin e upgradeuar Oracle E-Business Suite R12 (12.2.13) në version anglisht dhe shqip. Së treti migrimi i të dhënave historike.
Po kështu ruajtja e gjithë kostumizimeve/personalizime nga versioni aktual i sistemit në sistemin e përmirësuar. Një tjetër aspekt është trajnimi i përdoruesve (sipas metodës Trajno Trajnuesit) (Manualet e përdorimit për të gjitha modulet e sistemit, për institucionet online me SIFQ dhe ato offline. Manualet e përdorimit. Manuali konfigurimeve. Në fund edhe testimi i sistemit të përmirësuar (Scripts, etj) si dhe procesi i mirëmbajtjes. Realizimi i projektit do të kalojë në disa faza, specifikisht pesë të tilla nga nisja e kontratës e deri në fund të saj që përfshihet në total një periudhë prej 18 muajsh./kapitali.al
