Rama e përjashtoi dje një krisje të mundshme të miqësisë mes tij dhe Alex Soros, pasi fshiu fotot nga Instagram-i me këtë të fundit.
Kryesocialisti tha se fshirja e fotove ishte një spekulim dhe se ishte krenar për miqësinë me Soros.
“Alex Sorosin dhe të atin i kam pasur dhe do i kem miq dhe jam shumë krenar për atë miqësi. Përrallat dhe historitë propagandistike që kërkojnë të lidhin gjëra që nuk janë. Siç kam miq Aleksin dhe të atin kam dhe miq që nuk janë miq me ta por nuk bëj spekulime abuzime me miqtë dhe mos u bëni qesharakë, lërini historitë ti zgjidhin amerikanët me njeri tjetrin”, deklaroi Rama.
Alex Soros, sot, ka postuar disa foto nga Konferenca e Sigurisë në Mynih, ku ka ndarë edhe një foto të Ramës teksa është duke folur. Kjo lëvizje vjen pasi kryeministri i fshiu fotot me mikun e tij, pa dhënë asnjë shpjegim, përveç spekulimeve, siç i quajti ai.
Fshirja e fotove duket se ka nxehur Soros-in i cili në shenjë “hakmarrje” po e reklamon Ramën në Instagram e Facebook, si për të treguar se mes tyre nuk ka një krisje.
