Arbër Teqja ka vazhduar të përfitojë nga tenderët e pastrimit të spitaleve në Shqipëri, pavarësisht konflikteve të dukshme të interesit. Nëna e tij, Arjana Strakosha, është zëvendës drejtoreshë e përgjithshme e Qendrës Spitalore Universitare “Nënë Tereza” (QSUT), duke krijuar një situatë ku tenderët favorizojnë kompaninë e të birit, ‘Eco Riciklim sh.p.k’.
Tenderat e Maternitetit “Koço Gliozheni” dhe Spitalit Memorial Fier
Së fundmi, Arbër Teqja ka përfituar 194 milionë lekë për asgjësimin e mbetjeve në Maternitetin e Tiranës “Koço Gliozheni” dhe në Spitalin Memorial Fier.
Tenderi i parë, me objekt “Eliminimi i Mbetjeve të Rrezikshme Spitalore”, kishte një fond prej 20 milionë lekësh. Procedura është zhvilluar dhe firmosur nga drejtori Genci Hyska, me tenderin që u hap dhe u mbyll brenda një dite më 8 korrik 2024. Ofertën e vetme e dorëzoi firma ‘Eco Riciklim sh.p.k’ me vlerë 15 milionë lekë, duke konfirmuar mungesën e konkurrencës dhe duke ngritur dyshime për korrupsion.
Tenderi i dytë, me objekt “Shërbimi i trajtimit dhe asgjësimit të mbetjeve spitalore”, i zhvilluar nga Spitali Memorial Fier, kishte një fond prej 170 milionë lekësh. Teqja e fitoi tenderin pasi Elvis Miri, konkurrenti kryesor, u arrestua për mashtrim me tenderët. Kjo ka ngritur dyshime të forta mbi procedurën dhe legjitimitetin e këtij tenderi.
Historiku i Skandaleve dhe Arrestimet
Arbër Teqja nuk është i panjohur për skandalet. Në vitin 2015, ai u arrestua për pjesëmarrje në një skemë mashtrimi dhe vjedhje të parave publike me receta fiktive në bashkëpunim me Fondin e Sigurimit të Detyrueshëm të Kujdesit Shëndetësor (FSDKSH). Kompania e tij, ‘Eco Riciklim’, është raportuar nga Kontrolli i Lartë i Shtetit për mashtrim me asgjësimin e mbetjeve spitalore dhe ka përfituar nga 51 tendera në sektorin e shëndetësisë, 5 prej të cilëve direkt nga QSUT.
Arbër Teqja është një emër që SPAK duhet të ndjekë për të zbuluar rrjetin e korrupsionit që përfshin ministra dhe oligarkë.
Veprimtaria e tij e errët përfshin një sërë veprimesh kriminale: nga vjedhja e parave publike përmes recetave fiktive, te mashtrimi me zbatimin e 38 kontratave për asgjësimin e mbetjeve spitalore, dhe dyshimet për pastrim parash përmes kompanive fantazmë dhe resorteve luksoze.
Tenderët Korruptivë dhe Mashtrimi me Kontratat Publike: Teqja ka arritur të përfitojë miliona lekë përmes tenderëve të dyshimtë dhe kontratave publike të falsifikuara. Këto përfshijnë kontratat për asgjësimin e mbetjeve spitalore, ku ai ka përfituar në mënyrë të paligjshme fonde publike.
Krime Mjedisore dhe Korrupsion i Funksionarëve Publikë: Përmes kompanisë së tij, ‘Eco Riciklim’, Teqja është përfshirë në krime mjedisore dhe ka korruptuar funksionarë publikë për të siguruar kontrata të favorshme.
Skema Mashtrimi me TVSH-në dhe Recetat False: Teqja ka përdorur receta false për të vjedhur para nga shteti, dhe ka krijuar skema komplekse për të mashtruar me TVSH-në.
Pastrim Parash dhe Dyshimet për Kompani Fantazmë: Dyshohet se Teqja ka përdorur kompanitë fantazmë ‘FOREVER CONSTRUCTION’ dhe ‘DIAL-ALB’ për pastrimin e parave. Gjithashtu, resorti luksoz ‘Equos Resort’ është lidhur me aktivitetet e tij të dyshimta për pastrim parash.
Aferat me DIAL-ALB
Në vitin 2014, Arbër Teqja themelon kompaninë DIAL-ALB me objekt import-eksport të produkteve farmaceutike, me kapital 100 mijë lekë. Që pas themelimit, kompania është përfshirë në receta false, abuzim me çmimet dezinfektantëve dhe maskave gjatë pandemisë si dhe me mashtrim me pagat e dy punonjësve të vetëm që ka, duke i deklaruar 3-4 herë më pak se sa paga reale. DIAL-ALB është ndëshkuar nga Autoriteti i Konkurrencës për abuzim me shumëfishimin e çmimeve të dezinfektantëve dhe maskave, duke vjedhur qytetarët.
Pastrim para me FOREVER CONSTRUCTION
Pupaci i pastrimit të parave Arbër Teqja shfaqet edhe pas kompanisë së ndërtimit FOREVER CONSTRUCTION, e cila figuron pa asnjë punëtor dhe pa aktivitet real. Kjo kompani dyshohet se është hapur qëllimisht për pastrim parash, për të cilën do të japim detaje në vijim. Arbër Teqja shfaqet edhe pas resorit luksoz në Mullet të Tiranës si administrator, i cili dyshohet gjithashtu se është produkt pastrimit të parave publike./Gazeta reforma
