Gjykata e Shkodrës ka pranuar kërkesën e prokurorisë për sekuestrimin e disa pasurive të lidhura me biznesmenin Ago Gjolaj. Sipas akuzës, Gjolaj – i dënuar më herët, nuk i justifikon pasuritë me burime të ligjshme.
Masa e sekuestros u kërkua nga prokuroria në kuadër të një procedimi penal ndaj Gjolajt, për akuzën e pastrimit të parave.
Hetimet
Prokuroria bën me dije se ka regjistruar procedimin penal nr.1042 datë 27 Korrik 2017 për kryerjen e veprës penale “Pastrimi i produkteve të veprës penale ose veprimtarisë kriminale”. “Nga shqyrtimi i materialit kallëzues referuar nga Drejtoria e Përgjithshme për Policinë e Shtetit rezulton se në bazë të informacioneve dhe dokumentacionit të administruar bazuar në ligjin nr.108 datë 31.07.2014 ‘Për Policinë e Shtetit’, i ndryshuar, rezulton se shtetasi Ago Gjolaj ka dyshime se merret me kontrabandimin dhe tregtimin e mallrave kontrabandë si dhe është evidentuar si pjesëmarrës në grup kriminal që merret me trafikimin e lëndëve narkotike”, thuhet në një njoftim të prokurorisë.
Ky shtetas, sqaron më tej akuza: së bashku me dy vëllezërit e tij, janë hetuar disa herë nga autoritet shqiptare madje edhe janë dënuar për vepra penale të ndryshme (kontrabandë, tregtim mallrash kontrabandë etj). Referuar të dhënave të grumbulluara deri tani, Policia Gjyqësore ka dyshime të arsyeshme se pasuritë e shtetasit Gjolajt dhe familjarëve të tij nuk justifikohen nga pikëpamja ekonomike me të ardhura të ligjshme.
Gjithashtu, Prokuroria shton se ka regjistruar edhe procedimin penal nr. 1372/2020 për kryerjen e veprës penale “Pastrimi i produkteve të veprës penale ose veprimtarisë kriminale”, pas referimit nga Drejtoria Vendore e Policisë Shkodër, e cila është vënë në dijeni nga Zyra Kombëtare Interpol Tirana, se autoritetet e Malit të Zi kanë qenë duke hetuar shtetasen shqiptare Sonjela Gjolaj, subjekt i lidhur me Ago Gjolajn (bashkëshortja). Hetimet për këtë çështje nisën pasi më datë 12.04.2018, ajo ka nënshkruar një kontratë për blerjen e një jahti luksoz me vlerë 300,000 (treqind mijë) euro nga shtetasi malazez S.J, i përfshirë në veprimtari kriminale dhe pastrim parash.
Pasuritë e sekuestruara
Pasuritë e sekuestruara të Gjolajt dhe personave të lidhur me të me një vendim të Gjykatës së Shkodrës dhënë dy ditë më parë, janë:
Shoqëria tregtare “B.M” SHPK, me Nipt: K68404706Q (sipas QKB, në pronësi të Sonila Gjolajt);
Pasuritë e paluajtshme në pronësi të shoqërisë “B.M” SHPK, konkretisht, pasuria nr. 1155/8 ND2+N2, vol.28, fq.58, ZK.2105, Shoë Room, me sipërfaqe 199 m2; pasuria nr.1345/1, vol.10, fq.176, ZK.2221 indeks harte k-34-63 (95-D), adresa Koplik i sipërm, Rr.1, Malësi e Madhe dhe pasuria nr.37/4, vol.6, fq.69, ZK.1977;
97 automjete në pronësi të shoqërisë “B.M” Shpk;
Gjendja aktuale në të gjitha llogaritë bankare (llogari rrjedhëse/depozita) në të gjithë bankat e nivelit të dytë në Republikën e Shqipërisë në emër të Ago Gjolajt, Sonila Gjolajt, si dhe të shoqërisë “B.M” SHPK;
Sipas informacioneve nga faqja zyrtare e vetë firmës së sekuestruar, kjo kompani importon produkte të njohura në tregun vendas si pija energjike “8S2” apo birra “Bavaria”.
