Aksionet e familjes Halili te Tirana dalin në shitje.
Zyra e Përmbarimit privat Albase ka shpallur daljen në ankand të 66% të aksioneve të klubit të futbollit Tirana, të cilat i përkisnin Presidentit të klubit Refik Halili dhe që ishin prej kohësh nën sekuestro, një ankand ky që do të mbyllet në datën 22 prill, të martën e ardhshme dhe ku çdo i interesuar mund të blejë kuotën e mazhorancës të klubit më të titulluar në vend, teksa pjesa tjetër prej 34% të aksioneve është në pronësinë e Bashkisë Tiranë.
Siç ka mundur të mësojë “SuperSport”, bëhet fjalë për një detyrim të vjetër të shoqërisë “Halili shpk”, ndaj familjes Preza. Në origjinën e tij është ndërtim i administratorit të shoqërisë, Refik Halili në tokën e kësaj familjeje që ka fituar prej kohësh të drejtën e dëmshpërblimit në të gjitha seancat e gjyqësorit, arsye për të cilën deri më tani aksionet e familjes Halili kanë qenë nën sekuestro.
Bëhet fjalë për një detyrim që bashkë me kamatvonesat kap shumën e 2 milionë e 400 mijë eurove, shumë kjo që duhej të shlyhej nga Refik Halili ndaj familjes Preza.
Shoqëria përmbarimore e ngarkuar për të ekzekutuar vendimin pasi ka tentuar pa sukses gjetjen e një zgjidhjeje me marrëveshje, ka konstatuar se familja Halili nuk disponon asnjë pasuri tjetër për t’u vënë nën sekuestro për shlyerjen e këtij detyrimi, pasi çdo aset tjetër i Presidentit të Tiranës rezulton i bllokuar për shkak të borxheve apo kredive ndaj dhe ka sekuestruar 66% të aksioneve të Refik Halilit te Tirana, të cilat tanimë kanë dalë në shitje në një ankand me vlerë fillestare 161 720 400 lekë. Mbetet për t’u parë se cilët do të jenë të interesuarit për blerjen e kësaj kuote aksionesh në ankandin që përjeton fazën finale në ditën e martë, ashtu si dhe reagimi i vetë Presidentit të Tiranës në lidhje me këtë çështje.
