Kandidati për president Donald Trump do të jetë sot sërish në sallën e gjyqit ndërsa procesi për përzgjedhjen e jurisë vazhdon. Trump akuzohet për falsifikim të të dhënave të biznesit. Ndërkohë siç njofton korrespondenti i Zërit të Amerikës, Scott Stearns, kundërshtari i tij demokrat, presidenti Joe Biden vazhdon fushatën elektorale duke vënë theksin tek vizionet e ndryshme të dy kandidatëve për një ekonomi që duhet t’u shërbejë të gjithëve.
Kandidatët për president Joe Biden dhe Donald Trump patën angazhime krejt të ndryshme këtë javë.
Ish-presidenti Trump u gjend në sallën e gjykatës në Nju Jork ku përballet me 34 akuza për falsifikim të të dhënave të biznesit.
“Nuk e di se si mund të kesh një gjyq që zhvillohet në mes të zgjedhjeve. Nuk është e drejtë”, tha ai.
Ndërkohë, presidenti Biden po bën fushatë elektorale në shtetin e Pensilvanisë.
Gjyqi ndaj ish-presidentit Trump ka të bëjë me pagesat që ai ka bërë përpara zgjedhjeve të vitit 2016 për të siguruar heshtjen e dy grave, të cilat pretendojnë se kanë patur marrëdhënie seksuale me të. Prokurorët thonë se zoti Trump falsifikoi të dhënat e biznesit për t’i fshehur pagesat që ishin bërë nëpërmjet ish-avokatit të tij.
Zoti Trump ka deklaruar pafajësinë për këto akuza dhe avokatët e tij thonë se pagesat ishin shpenzime të ligjshme.
Ish-presidenti thotë se prania i tij në gjykata është ndërhyrje në zgjedhje nga një gjyqësor që po përdoret politikisht.
“Ky është një sulm ndaj vendit tonë dhe është një vend që po dështon. Është një vend që drejtohet nga një njeri i paaftë që është shumë i përfshirë me këtë çështje. Është vërtet një sulm ndaj një kundërshtari politik. Kjo është e gjitha”, tha zoti Trump.
Ish-presidenti nuk është i detyruar të dëshmojë në këtë proces gjyqësor, por ish-prokurori federal Neama Rahmani thotë se ai do të dëshmojë për arsye politike.
“Kjo çështje gjyqësore është jo vetëm për sallën e gjykatës, por edhe për opinionin publik. Dhe Trump-i është në një vit zgjedhor dhe ai do të ulet në bankën e dëshmitarëve dhe do t’i drejtohet popullit amerikan dhe votuesve të pavendosur. Mendoj se nëse do të vendoste të mos fliste, kjo do t’i kthehej kundër tij në sytë e votuesve të pavendosur”, thotë zoti Rahmani.
Ndërsa kundërshtari i tij politik ndodhet në gjykatë, presidenti Biden vazhdon me fushatën e tij elektorale.
“Donald Trump-i e shikon botën ndryshe nga ju dhe unë. Ai zgjohet në Mar-a-Lago duke menduar për veten. Se si mundet të ndihmojë miqtë e tij miliarderë të marrin pushtetin dhe të imponojnë ndaj ne të tjerëve axhendën e tyre ekstreme. Dëgjojeni se çfarë thotë. Ai thotë, po e citoj, ‘Do të jem diktator në ditën e parë’. Po e citoj, ‘unë jam shpagimi juaj’,” tha presidenti Biden.
Dy kandidatët kanë “vizione të kundërta” për ekonominë amerikane, thotë presidenti Biden, duke “ngritur pikëpyetje themelore për atë se çfarë është e drejtë”.
“Ka rëndësi origjina jonë. Kur unë e shoh ekonominë, unë nuk e shoh me sytë e Mar-a-Lagos. Unë e shoh me sytë e Scranton-it, dhe kjo nuk është hiperbolë, është fakt. Aty ku ndershmëria dhe dinjiteti kanë rëndësi, ku besimi ka rëndësi. Ku familja është gjithçka”, tha presidenti Biden.
Ish-presidenti Trump tha se nuk është e drejtë që ai të qëndrojë i bllokuar në gjykatë, ndërsa presidenti Biden të jetë në aktivitete fushate.
“Duhet të isha tani duke bërë fushatë në Pensilvani, në Florida, në Karolinën e Veriut dhe në shumë shtete të tjera. E gjitha kjo po vjen nga Shtëpia e Bardhë Biden, pasi ky njeri nuk është në gjendje të lidhë dy fjali bashkë. Ai nuk mundet të bëjë fushatë. Ai po e përdor këtë për t’u përpjekur që të fitojë zgjedhjet”, tha zoti Trump.
Ai ka arritur të planifikojë disa aktivitete elektorale në Nju Jork ndërsa vazhdon gjyqi, por mundësitë që i mbeten për aktivitete në shtetet e tjera që kanë rëndësi për zgjedhjet presidenciale, janë të kufizuara vetëm gjatë fundjavave.
Ish-presidenti Trump u takua me mbështetësit në Pensilvani të shtunën e kaluar dhe ka një aktivitet të planifikuar në Karolinën e Veriut këtë fundjavë./VOA
