Policia e Shkodrës nëpërmjet një njoftimi ka bërë me dije se ka zhvilluar një ndër operacionet më të rëndësishme në historinë e policisë së Shkodrës pasi ka arrestuar një 23-vjeccar me 100 fara hashashi dhe ky arrestim ka ardhur pas javëve të tëra shkëmbimi informacioni midis policisë dhe prokurorisë dhe pas shumë e shumë orësh punë dhe lodhje nga policia, bëjnë me dije vetë uniformat blu.
Kur shqipëria është e mbushur me tonelata hashash, policia harxhon javë dhe muaj për të arrestuar një të ri i cili mjafton një e pyetur në lagje dhe e arrestove për hashash.
Teksa policia duhet të bëjë sikur punon, përballemi edhe me deklaratat e tyre madhështore për një 23-vjeccar të arrestuar me 100 fara hashashi.
Njoftimi:
Vau i Dejës/Vijon zbatimi i masave në kuadër të planit operacional kombëtar “Tempulli 2”.
Parandalohet dhe goditet një rast i tentativës për shitje të farave të cannabisit, me qëllim kultivimin e tyre.
Gjatë operacionit është goditur edhe një rast i shpërndarjes së dozave të cannabisit, në zona të ndryshme të Vaut të Dejës.
Finalizohet pas një pune hetimore disajavore, me metoda speciale, operacioni policor i koduar “Prova”.
Kapet në flagrancë dhe vihet në pranga një 23-vjeçar që shiste fara kanabisi për t’i kultivuar dhe lëndë narkotike cannabis në doza.
Sekuestrohen qindra doza cannabis dhe 100 fara cannabis, që u gjetën gjatë kontrollit në automjetin dhe në banesën e këtij shtetasi.
Si rezultat i një hetimi proaktiv, të ndjekur për disa javë, në bashkëpunim me Prokurorinë e Shkodrës, për goditjen e veprimtarisë kriminale në fushën e kultivimit, prodhimit dhe shitjes së cannabisit, shërbimet e Komisariatit të Policisë Vau i Dejës kanë organizuar dhe finalizuar operacionin policor të koduar “Prova”.
Gjatë këtij operacioni, në një vendparkim automjetesh, në qytetin e Shkodrës, shërbimet e Policisë kanë kapur në flagrancë shtetasin S. K., në automjetin e të cilit gjetën një qese me 100 fara të dyshuara narkotike cannabis sativa dhe një sasi lënde të dyshuar narkotike cannabis sativa.
Në vijim të operacionit, gjatë kontrollit në banesën e këtij shtetasi, shërbimet e Policisë kanë gjetur një tjetër sasi lënde të dyshuar narkotike cannabis sativa.
Në përfundim të veprimeve procedurale u arrestua në flagrancë shtetasi S. K., 23 vjeç, banues në Shkodër, si dhe u sekuestruan në cilësinë e provës materiale 570 gramë lëndë e dyshuar narkotike cannabis sativa, qindra doza të kësaj lënde dhe 100 fara cannabis sativa.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
